„Okkur tókst að sýna okkar rétta andlit að þessu sinni, ólíkt fyrri viðureigninni ytra þegar leikur okkar fór í smá bull,“ sagði Thea Imani Sturludóttir markahæsti leikmaður Vals í samtali við handbolta.is í kvöld eftir jafntefli Vals við þýska liðið Blomberg-Lippe, 22:22, í síðari viðureign liðanna í forkeppni Evrópudeildar kvenna í handknattleik á Hlíðarenda.
„Það var mjög vel gert hjá stelpunum að mæta svona ákveðnar til leiks að þessu sinni og sýna að við erum ekki eins langt frá Blomberg-Lippe og fyrri leikurinn gaf til kynna,“ sagði Thea Imani en Valur tapaði fyrri viðureigninni með 13 marka mun, 37:24, og er fallið úr leik þrátt fyrir jafnteflið í kvöld.
Thea Imani sagði engan vafa leika á að Blomberg-Lippe væri með afar vel skipað lið. Valur hafi hins vegar fallið í þá gryfju ytra að ætla sér að elta andstæðinginn, leika eins og hann. Það hafi ekki kunnað góðri lukku að stýra.
„Í dag tókst okkur að stjórna betur hraðanum og gera margt mikið betur. Vörnin small hjá okkur í síðari hálfleik með þeim afleiðingum að okkur tókst að því að koma þeim í meiri vandræði. Þar með varð leikur þeirra þyngri,“ sagði Thea Imani Sturludóttir var ánægð með hvernig þessu einvígi lauk þótt heildarniðurstaðan hafi þýtt að Valur er úr leik.
Lengra viðtal við Theu Imani er í myndskeiði hér fyrir ofan.
Skrýtið að spila á móti bestu vinkonunum
Þetta var bara alls ekki nógu gott
