Ólafur Brim hefur samið við ítalskt félagslið

Handknattleiksmaðurinn Ólafur Brim Stefánsson er sagður hafa samið við ítalska handknattleiksliðið Junior Fasano sem er með bækistöðvar á suðausturhluta landsins. Frá þessu segir á Handkastinu en Ólafur Brim hefur síðustu vikur leikið með Stjörnunni í Olísdeildinni.

Samningur Ólafs við ítalska liðið mun gilda út keppnistímabilið.

Junior Fasano situr í fjórða sæti í Seria A með 18 stig að loknum 15 leikjum. Fjórtán lið eiga sæti í Seria A. Þar af leiðandi eru 11 umferðir eftir óleiknar áður en kemur að úrslitakeppni fjögurra efstu liðanna í vor. Trieste og Bozen eru aðeins stigi á eftir í fimmta og sjötta sæti. Albatro er í þriðja sæti með 20 stig. Ljóst er að hvert stig getur skipt sköpum.