Ómar Ingi Magnússon heldur áfram að leika við hvern sinn fingur og um leið andstæðinga sína grátt á handboltavellinum. Hann skoraði 11 mörk í 12 skotum í kvöld þegar Evrópumeistarar SC Magdeburg unnu danska liðð GOG, 39:30, í fjórðu umferð B-riðils Meistaradeildar Evrópu. Leikið var í Danmörku.
Gísli Þorgeir Kristjánsson lét einnig verulega til sín taka. Hann skoraði fimm mörk í sjö skotum og gaf fimm stoðsendingar.
Elvar Örn Jónsson skoraði þrjú mörk fyrir Evrópumeistarana og lét til sína taka við varnarleikinn, að vanda.
Bjerre Frederik Friche var markahæstur í efnilegu liði GOG með níu mörk. Örvhenta skyttan, Hjalte Lykke skoraði fimm mörk.
Í hinni viðureign kvöldsins í B-riðli lagði pólska meistaraliðið Wisla Plock liðsmenn Eurofarm Pelister frá Norður Makedóníu, 36:25.
Tap í Þrándheimi og Lissabon
Íslendingunum sem léku með Kolstad og Sporting Lissabon í A-riðli kvöld gekk ekki sem best. Kolstad tapaði fyrir Aalborg, 35:26, í Þrándheimi og Orri Freyr Þorkelsson og liðsfélagar í portúgalska meistaraliðinu Sporting töpuðu á heimavelli fyrir Nantes, 39:28.
Sigvaldi Björn Guðjónsson skoraði þrjú mörk fyrir Kolstad. Arnór Snær Óskarsson og Benedikt Gunnar Óskarsson skoruðu ekki mark. Markvörðurinn Sigurjón Guðmundsson, sem þessa dagana hleypur í skarðið fyrir Svíann Andreas Palicka, spreytti sig á einu vítakasti en hafði ekki erindi sem erfiði.
Ekkert mark
Orri Freyr var ekki á meðal þeirra sem skoruðu fyrir Sporting í tapinu slæma á heimavelli fyrir Nantes. Sporting var undir eftir fyrri hálfleik, 23:11. Langt er síðan að Sporting hefur fengið jafn slæma útreið á heimavelli og í kvöld.
Staðan í riðlunum tveimur:
