Arnar Daði Arnarsson, þjálfari karlaliðs Gróttu, vekur athygli í færslu á Twitter í kvöld á dómi í leik KA og Gróttu í Olísdeild karla í handknattleik sem fram fór í KA-heimilinu.
Í stöðunni 26:25 þegar um fimm mínútur eru til leiksloka skorar Gunnar Dan Hlynsson, leikmaður Gróttu mark, sem dæmt var af. Eftir því sem næst verður komist var það mat dómaranna að Hannes Grimm hafi blokkerað varnarmann KA á ólöglegan hátt með þeim afleiðingum að Gunnar fær greiða leið í gegnum vörn KA.
Dómurinn orkar nokkurs tvímælis, alltént fyrir einfaldan áhugamann um handknattleik og án dómararéttinda eins og tíðindamaður handbolta.is er. En eins og sagt var hér á árum áður, dæmi nú hver fyrir sig en atvikið má sjá hér fyrir neðan.
Til lukku með sigurinn KA. Þessi dómur er fyrir utan mitt þekkingarsvið. Sennilega hárréttur dómur og allt það. Eða hvað. Einar. #Handkastið pic.twitter.com/rEjOpTg8XL
— Arnar Daði Arnarsson (@arnardadi) December 5, 2021
KA vann leikinn, 31:29, en eftir að Gróttu tókst ekki að jafna í stöðunni 26:25, rann leikurinn þeim úr greipum og KA-menn voru sterkari á lokakaflanum.
