Íslendingarnir þrír í portúgölsku 1. deildinni í handknattleik fögnuðu sigrum með liðum sínum í 7. umferð deildarinnar í gær. Sporting með Orra Frey Þorkelsson innanborðs og Porto með Þorstein Leó Gunnarsson eru áfram efst og taplaus með 21 stig hvort en þrjú stig eru gefin fyrir sigur í deildinni, tvö stig fyrir jafntefli og eitt fyrir að mæta til leiks.
Stiven Tobar Valencia og félagar í Benfica sitja í fjórða sæti deildarinnar. Þeir unnu Nazaré Fuas AC, 44:30, á heimavelli í gær. Stiven Tobar skoraði fimm mörk og var vikið einu sinni af leikvelli.
Meistarar Sporting Lissabon unnu ABC de Braga, 35:23, í Braga í gær. Orri Freyr Þorkelsson skoraði eitt mark fyrir Sporting. Francisco Costa skoraði 10 mörk og var markahæstur hjá Sporting.
ABC de Braga er í þriðja sæti deildarinnar en tókst ekki að standa meisturunum snúning.
Þorsteinn Leó Gunnarsson skoraði fimm mörk í sex marka sigri Porto á Avanca á heimavelli, 30:24. Leikmenn Porto spöruðu kraftana fyrir leikinn gegn Melsungen í Evrópudeildinni á þriðjudaginn en þá hefst fyrsta stig riðlakeppninnar.
