Valur hafði mikla yfirburði í leik við Stjörnuna í Meistarakeppni HSÍ í kvennaflokki í N1-höllinni í dag. Himinn og haf skildi liðin nánast að og voru úrslitin eftir því, 29:10. Staðan að loknum fyrri hálfleik var 17:7.
Valur var kominn með 20 marka forskot þegar níu mínútur voru til leiksloka. Tölurnar segja allt um þá yfirburði sem Valur hafði í leiknum. Stjarnan skoraði aðeins eitt mark síðustu 20 mínútur leiksins. Að sama skapi skoraði Valur aðeins eitt mark á síðustu 10 mínútum leiksins.
Meiðsli hjá Stjörnunni
Til að auka enn á erfiðleika Stjörnunnar í leiknum þá vantaði Emblu Steindórsdóttur og Tinnu Sigurrós Traustadóttur. Báðar eru frá vegna meiðsla. Þess utan er Helena Rut Örvarsdóttir komin í frí frá handknattleik. Hún er ólétt.
Valur á hinn bóginn hefur meiri breidd í sínum leikmannhópi en í fyrra. Lovísa Thompson lék sinn fyrsta leik með Val síðan í maí 2022. Til viðbótar við afar sterkan leikmannahóp sem tók þátt í leiknum í dag þá voru Morgan Marie Þorkelsdóttir og Mariam Eradze fjarverandi. Báðar eru að jafna sig af meiðslum.
Mörk Vals: Elín Rósa Magnúsdóttir 7, Lovísa Thompson 5, Thea Imani Sturludóttir 5, Þórey Anna Ásgeirsdóttir 3, Arna Karitas Eiríksdóttir 2, Elísa Elíasdóttir 2, Lilja Ágústsdóttir 2, Sigríður Hauksdóttir 1, Ásdís Þóra Ágústsdóttir 1, Hildigunnur Einarsdóttir 1.
Varin skot: Hafdís Renötudóttir 11, Silja Müller 7.
Mörk Stjörnunnar: Eva Björk Davíðsdóttir 4/1, Brynja Katrín Benediktsdóttir 3, Anna Lára Davíðsdóttir 2, Hrafnhildur Anna Þorleifsdóttir 1.
Varin skot: Hrafnhildur Anna Þorleifsdóttir 10.
Handbolti.is fylgdist með leiknum í textalýsingu hér fyrir neðan.
