Óvissa ríkir ennþá hvort Aron Pálmarsson muni geta leikið með Barcelona í undanúrslitum og í úrslitum Meistaradeildar Evrópu í handknattleik sem fram fer á mánudaginn og á þriðjudaginn í Lanxess-Arena í Köln. Aron kenndi sér meiðsla í leik Barcelona og Bidasoa Irun um síðustu helgi. Við skoðun kom í ljós að hnékskeljasinin á vinstra hné bólgnaði upp.
Xavi Pascual, þjálfari Barcelona, sagði á blaðamannafundi í gær að óvíst væri hvort hann gæti teflt fram Aroni á mánudaginn. Barcelona mætir PSG í undanúrslitum á mánudaginn. Vinni Barcelona leikinn við PSG mætir liðið annað hvort Kiel eða Veszprém í úrslitaleik á þriðjdagskvöld. Leikirnir eru liður í keppni Meistaradeildar frá leiktíðinni 2019/2020 sem ekki tókst að ljúka á vormánuðum.
Ekki hafa fengist skýrar upplýsingar hversu alvarleg meiðslin eru og hvort þau muni hugsanlega koma niður á þátttöku Arons í leikjum íslenska landsliðsins sem standa fyrir dyrum í janúar, í undankeppni EM og á heimsmeistaramótinu í Egyptalandi. Handbolti.is hefur verið í sambandi við menn vegna málsins en þeir hafa varist fregna.
