Ein fremsta og jafnframt ein umtalaðasta handknattleikskona undanfarinna ára, Estavana Polman, hefur verið seld til Rapid Búkarest eftir aðeins fimm mánuði í herbúðum danska úrvalsdeildarliðsins Nykøbing Falster (NFH). Hún kveður um leið Danmörku eftir 11 ára veru en 19 ára gömul gekk Polman til liðs við SønderjyskE.
Rapid Búkarest er nýliði í Meistaradeild kvenna í handknattleik og hefur komið liða mest á óvart á leiktíðinni. Rapid er efst í B-riðli keppninnar ásamt Györ með 10 stig eftir sex viðureignir og hefur ekki tapað leik til þessa.
Polman fær þar með tækifæri til þess að leika í Meistaradeild Evrópu, nokkuð sem er ekki í boði hjá Nykøbing Falster.
Gátu ekki hafnað tilboðinu
Talsmaður Nykøbing Falster segir í samtali við TV2 í félagið hafi fengið tilboð frá Rapid og því hafi félagið ekki getað hafnað. Ákvæði hafi verið í samningi Polman og Nykøbing Falster sem hafi gefið henni möguleika á að fara ef viðunandi tilboð bærist.
Kastaðist í kekki
Polman var burðarás hollenska landsliðsins þegar það varð heimsmeistari fyrir þremur árum auk þess að vera eitt helsta tromp danska liðsins Team Esbjerg. Sumarið 2020 sleit Polman krossband. Á ýmsu gekk í bataferlinu sem teygðist úr. Þegar á leið tímann kastaðist í kekki milli Polman annars vegar og þjálfara og stjórnenda Esbjerg hinsvegar. Andaði mjög köldu á milli fyrrverandi samherja.
Mamman skarst í leikinn
Botninum var væntanlega náð þegar móðir Polman las framkvæmdastjóra Esbjerg pistilinn í viðurvist áhorfenda á leik á síðasta tímabili. Virtist þá endanlega sjóða uppúr sem endaði með að Polman var sett út úr leikmannahópi Esbjerg og sagt að hún gæti leitað á ný mið. Um tíma leit út fyrir að Polman höfðaði mál á hendur Esbjergliðinu fyrir samningsbrot en því var afstýrt.
Virðist vera orðin góð
Polman hefur leikið flesta leiki Nykøbing Falster á keppnistímabilinu og var einnig í eldlínunni með hollenska landsliðinu á EM sem lauk á dögunum. Hún virðist hafa náð sér fullkomlega á strik eftir meiðslin.
Ekki fylgir fréttum dagsins hvort eiginmaður Polman, Rafael van der Vaart, fylgi henni til Búkarest. Hann er knattspyrnuþjálfari í Danmörku. Polman og van der Vaart eiga fimm ára gamla dóttur.
Polman kvaddi stuðningsmenn Nykøbing Falster í dag með eftirfarandi myndbandi á Facebook.
