Sænska handknattleiksliðið IFK Kristianstad greinir frá þeim óvæntu tíðindum í morgun að landsliðsmaðurinn Ólafur Andrés Guðmundsson hafi leikið sinn síðasta leik fyrir félagið eftir sex ára dvöl. Þar segir ennfremur að Ólafur Andrés hafi samið við franska liðið Montpellier sem hafnaði í 2. sæti efstu deildar í vor.
Handbolti.is greindi fyrst frá vistaskiptunum síðdegis miðvikudaginn 7. júlí og þá samkvæmt traustum heimildum enda voru þá allir endar samningsins hnýttir þótt reynt hafi verið að halda öðru fram. Í framhaldinu greip um sig talsverð taugveiklun og afskipti af ritstjórn.
Þótt Montpellier HB hafi ekki staðfest vistaskiptin um kl. 9.30 að morgni mánudagsins 12. júlí þá ætlar ritstjóri handbolti.is að leyfa sér þá framhleypni að birta hér að neðan fréttina frá síðasta miðvikudag. Hún stenst tímans tönn í öllum aðalatriðum enda hefur handbolti.is reynt eftir megni að birta ábyggilegar fréttir. [email protected]
