Hörður leikur til úrslita í umspili Olísdeildar karla í handknattleik eftir sigur á Gróttu, 39:38, í tvíframlengdum háspennuleik í íþróttahúsinu á Torfnesi í kvöld. Jhonatan C. R. Dos Santos skoraði sigurmarkið á síðustu sekúndu 80 mínútna kappleiks. Hörður mætir annaðhvort Stjörnunni eða Fjölni í úrslitarimmu um sæti í Olísdeild karla. Stjarnan og Fjölnir mætast í oddaleik á laugardaginn í Hekluhöllinni.
Hörður vann fyrri viðureignina við Gróttu á sunnudaginn, 31:28, eftir mikinn endasprett.
Annað árið í röð tapar Grótta í umspilskeppni Olísdeildar. Fyrir ári féll liðið úr deildinni eftir tap fyrir Selfoss í úrslitum umspilsins.
Hörður var fimm mörkum yfir í hálfleik, 15:10, og virtist stefna í öruggan sigur framan af í síðari hálfleik á Torfnesi í kvöld. Staðan var m.a. 19:13 eftir nærri tíu mínútna leik í síðari hálfleik. Gróttumenn blésu til sóknar og komust yfir, 25:24, þegar rúmar sjö mínútur voru til leiksloka. Þegar 60 mínútur voru að baki stóðu leikar jafnir, 27:27.
Grótta fór betur af stað í fyrri framlengingunni og náði um skeið þriggja marka forskoti, 31:28. Harðarmenn lögðu ekki árar í báti og Guilherme Carmignoli De Andrade jafnaði, 32:32, beint úr aukakasti þegar leiktími fyrri framlengingarinnar var úti.
Í síðari framlengingunni voru Harðarmenn sterkari framan af og komust þremur mörkum yfir, 37:34. Leikmenn Gróttu lögðu allt í sölurnar og tókst þrátt fyrir stórleik Stefáns Freys Jónssonar markvarðar Harðar að jafna metin, 38:38, þegar 15 sekúndur voru eftir af leiktíma síðari framlengingar. Santos sá til þess að ekki kom til vítakeppni er hann skoraði sigurmarkið með þrumuskoti.
Mörk Harðar: Guilherme Carmignoli De Andrade 9, Kei Anegayama 7, Yuji Moriya 6, Shuto Takenaka 6, Jose Esteves Lopes Neto 4, Jhonatan C. R. Dos Santos 3, Axel Vilji Bragason 2, Pétur Þór Jónsson 1, Sudario Eidur Carneiro 1.
Varin skot: Stefán Freyr Jónsson 19.
Mörk Gróttu: Antoine Óskar Pantano 10, Sæþór Atlason 9, Bessi Teitsson 6, Gunnar Hrafn Pálsson 5, Ari Pétur Eiríksson 4, Þorgeir Bjarki Davíðsson 2, Tómas Bragi Lorriaux Starrason 1, Atli Steinn Arnarson 1.
Varin skot: Hannes Pétur Hauksson 9, Þórður Magnús Árnason 1.
