Ungmennalið Vals færðist upp í fjórða sæti Grill 66-deildar kvenna í gærkvöld með 11 marka sigri á ungmennaliði HK en leikið var í Kórnum í Kópavogi. Valur var sjö mörkum yfir að loknum fyrri hálfleik en liðið var með frumkvæði í viðureigninni frá upphafi til enda.
Sara Katrín Gunnarsdóttir átti stórleik fyrir HK-liðið og skoraði 13 mörk. Hún var Valsliðinu illviðráðanleg. Ásdís Þóra Ágústsdóttir var atkvæðamest í Valsliðinu og skoraði níu mörk.
Ungmennalið Fram er efst í deildinni með 12 stig eftir sjö leiki. Grótta er næst á eftir með 10 stig, einnig að loknum sjö leikjum. Afturelding og Valur U koma þar á eftir í þriðja til fjórða sæti.
Heil umferð, fjórir leikir, verða í Grill 66-deild kvenna á miðvikudagskvöld. Valur U og Selfoss eigast við, Víkingur sækir Gróttu heim, Afturelding fær Fjölni-Fylki í heimsókn og HK U mætir í íþróttahúsið í Austurbegi og leikur við ÍR sem vann ungmennalið Fram í gær.
Mörk HK U.: Sara Katrín Gunnarsdóttir 13, Lovísa Líf Helenudóttir 3, Ólöf Ásta Arnþórsdóttir 3, Eva Hrund Harðardóttir 2, Hrafnhildur Hólm Guðnadóttir 2, Heiðrún Berg Sverrisdóttir 1, Leandra Náttsól Salvamoser 1, Brynja Katrín Benediktsdóttir 1, Embla Steindórsdóttir 1.
Mörk Vals U.: Ásdís Þóra Ágústsdóttir 9, Ída Margrét Stefánsdóttir 7, Karen Helga Ólafsdóttir 7, Karlotta Kjerúlf Óskarsdóttir 5, Elín Rósa Magnúsdóttir 3, Vala Magnúsdóttir 2, Hafdís Hera Arnþórsdóttir 2, Hildur Sigurðardóttir 1, Elín Helga Lárusdóttir 1, Lilja Ágústsdóttir 1.
