Eins og staðan er núna þá verður ekki sýnt í sjónvarpi frá leikjum í Meistaradeildum karla og kvenna og Evrópudeildunum í Danmörku, Noregi og Svíþjóð á næstu leiktíð. Engin sjónvarpsstöð hefur keypt sýningaréttinn ennþá og virðist aukinnar svartsýni gæta að úr málinu greiðist. Þetta gerist m.a. þrátt fyrir að t.d. metfjöldi danskra félagsliða taki þátt í mótunum fjórum.
Forráðamenn margra félagsliða sjá fram á verulega lægri tekjum af sölu auglýsinga ef leikirnir verða ekki sýndir sjónvarpi. Á þetta ekk síst við í Danmörku þar sem áhugi fyrir handknattleik er mikill og fer vaxandi.
Handknattleikssamband Evrópu sendi frá sér tilkynningu í dag þar sem staða mála er hörmuð. Fram kemur að lifað sé voninni um að samningar náist um kaup á sýningaréttinum áður en flautað verður til leiks í mótunum fjórum.
Til að hafa vaðið fyrir neðan sig segir EHF að unnið sé að annarri lausn til að áhugasamir íbúar í Skandinavíu geti átt þess kost að sjá leiki mótanna í beinni útsendingu. Ekki kemur skýrt fram í hverju sú lausn felst en líklegt er að um sé að ræða streymisveitu sem býður til sölu aðgang að stökum leikjum eða áskrift til lengri tíma.
