Landsliðsmaðurinn Oddur Gretarsson skoraði í gær sitt fyrsta mark á heimsmeistaramóti fyrir íslenska landsliðið þótt hann sé alls ekki nýliði í landsliðinu þegar kemur að þátttöku á heimsmeistaramóti.
Þrítugasta mark Íslands á 44. mínútu sigurleiksins á Alsír í gær var fyrsta markið sem Oddur skorar á heimsmeistaramóti. Hann bætti við tveimur til viðbótar áður en leikurinn var úti og fékk kjörið færi til að bæta fjórða markinu við.
Oddur var í íslenska landsliðinu á HM 2011 í Svíþjóð. Hann var í sautján manna landsliðshópi sem Guðmundur Þórður Guðmundsson valdi til þátttöku í mótinu.
Oddur var fyrir utan leikmannahópinn á HM 2011, sem skipaður var 16 leikmönnum, þar til í tveimur síðustu leikjum íslenska liðsins. Þá skipti Oddur við Ingimund Ingimundarson sem meiddist og varð að draga sig til hliðar. Oddur kom lítið við sögu í leikjunum tveimur, gegn Frökkum í sex marka tapi í Jönköping, 34:28, og á móti Króötum í miklum spennutrylli í Malmö Arena í viðureign um fimmta sætið. Króatar unnu leikinn með eins marks mun.
