Spánverjar brenndu sig ekki á sama soðinu tvisvar

Spánn varð í kvöld Evrópumeistari í handknattleik karla, skipuðum liðum 20 ára og yngri í karlaflokki. Spánn vann granna sína frá Portúgal, 35:31, í Arena Zlatorog í Celje í Slóveníu í úrslitaleik sem var aldrei spennandi. Spænska liðið var sjö mörkum yfir að loknum fyrri hálfleik, 20:13. Spánverjar eru einnig heimsmeistarar í 19 ára flokki og Evrópumeistarar 18 ára liða fyrir 2 árum. Alls hefur þessi hópur unnið 22 af 23 keppnisleikjum sínum á EM og HM á þremur árum.

Þetta er í fjórða sinn sem Spánverjar verða Evrópumeistarar 20 ára liða í karlaflokki. Þeir jafna þar með metin við Dani sem hafa unnið titilinn fjórum sinnum. Danir hrepptu bronsverðlaun á mótinu að þessu sinni. Þeir lögðu Þjóðverja, 26:23, á sannfærandi hátt fyrr í kvöld. Sigurður Hjörtur Þrastarson og Svavar Ólafur Pétursson dæmdu bronsleikinn og komust slysalaust frá honum.

Portúgal var fyrir úrslitaleikinn í kvöld eina taplausa liðið á mótinu. Þeir höfðu m.a. unnið Spánverja með eins mark mun í riðlakeppni átta liða úrslita. Ljóst var í leiknum í kvöld að leikmenn spænska liðsins ætluðu ekki að brenna sig á sama soðinu tvisvar. Þeir gengu hreint til verks og gáfu leikmönnum portúgalska liðsins aldrei færi til þess að finna smjörþefinn af Evrópumeistaratitlinum.

Ferran Castillo Oliveras var markahæstur í spænska liðinu með 11 mörk. Barcelona ungstirnið Petar Cikusa var næstur með sex mörk. Miguel Olivera var markahæstur hjá Portúgal með 11 mörk. Markverðir beggja liða voru miður sín og vörðu fá skot.

Fjórir leikmenn spænska landsliðsins eru samningsbundnir Barcelona, Petar Cikusa, Djordje Cikusa, Ian Barrufet og Òscar Grau.

EMU20 karla: Leikir, úrslit og staðan, milliriðlar og sætisleikir

Röð liðanna á EM:

• Fimmtán efstu eftir auk Póllands öðlast þátttökurétt á HM 21 árs landsliða sem fram fer í Póllandi síðari hluta júnímánaðar á næsta ári.