„Við spiluðum mjög vel, ekki síst í fyrri hálfleik. Okkur tókst að skapa okkur góð færi og skora auk þess sem varnarleikurinn var mjög góður,“ sagði Dagur Sigurðsson landsliðsþjálfari Króata í viðtali við handbolta.is eftir eins marks sigur, 30:29, á íslenska landsliðinu á Evrópumótinu í handknattleik karla í Malmö Arena í dag.
„Einnig skipti það miklu máli að við skiluðum okkur í vörnina og náðum að stilla okkur upp. Flest lið eiga erfitt með að brjóta niður vörnina okkar en við höfum átt við það vandamál að stríða að fá okkur mörg hraðaupphlaup. Okkur tókst að leysa það vandamál betur í dag,“ sagði Dagur.
Erum ennþá með
„Okkur hefur ekki tekist að sýna svona leiki upp á síðkastið, til dæmis gegn Þjóðverjum í æfingaleikjum fyrir mótið. Ég er þess vegna ánægður að sjá þennan leik. Síðan verðum við að sjá til með framhaldið. Við erum að minnsta kostu áfram með í mótinu. Það hefði verið slæmt að vera stigalaus eftir daginn,“ sagði Dagur Sigurðsson landsliðsþjálfari Króata í viðtali við handbolta.is í Malmö Arena í dag.
