Íslenska kvennalandsliðið í handknattleik mun ekki mæta ísraelska landsliðinu í Ísrael þegar þau mætast í síðari viðureigninni í umspili um sæti á HM í 12. eða 13. apríl á næsta ári. Þetta staðfesti Róbert Geir Gíslason framkvæmdastjóri HSÍ við handbolta.is í dag. Róbert Geir er í Vínarborg þar sem hann situr fundi á vegum Handknattleikssambands Evrópu fyrir hönd HSÍ.
„Framkvæmdastjóri ísraelska handknattleikssambandsins sagði á fundi í gær að landslið þeirra myndi ekki leika heimaleik sinn í umspilinu í Ísrael. Ég get því staðfest að síðari leikurinn fer ekki fram í Ísrael. En hvar hann verður leikinn liggur ekki fyrir en ég vonast til að það skýrist á allra næstu dögum,“ sagði Róbert Geir við handbolta.is fyrir stundu.
Fyrri viðureignin á milli Íslands og Ísrael verður hér á landi 9. eða 10. apríl. Hvort ísraelska landsliðið leikur síðari leikinn hér á landi einnig eða í einhverju Evrópulandi liggur væntanlega fyrir á næstu dögum.
A-landslið kvenna – fréttasíða.
