Línumaðurinn efnilegi Þórður Tandri Ágústsson gengur til liðs við Stjörnuna í sumar. Þórður Tandri leikur nú með Þór Akureyri og hefur vakið mikla athygli fyrir vasklega frammistöðu, vinnusemi og harðfylgi. Frá þessu greinir Handknattleiksdeild Stjörnunnar í tilkynningu á Facebook-síðu sinni í morgunsárið.
Þórður er 21 árs gamall ólst upp í Þorpinu og byrjaði að æfa handbolta 9 ára. Hann þótti fljótlega efnilegur línumaður og hefur tekið miklum framförum undanfarin tvö ár. Hann hefur skorað 32 mörk í 12 leikjum með Þór í Olísdeildinni á leiktíðinni.
Fleiri lið í Olísdeildinni voru með Þórð Tandra í sigtinu, samkvæmt heimildum handbolta.is.
Þórður verður ekki eini leikmaður Stjörnunnar sem hefur rætur að rekja til Akureyrar. Brynjar Hólm Grétarsson, Hafþór Már Vignisson og Dagur Gautason eru frá Akureyri og eru fyrir í herbúðum Stjörnuliðsins.
