- Auglýsing -
Stjarnan fór með sigur úr býtum í UMSK-mótinu í handknattleik kvenna en liðið lék sinn þriðja og síðasta leik í kvöld og vann hann eins og tvo þá fyrri á mótinu. Stjarnan lauk þar með keppni með fullu húsi stiga og þótt hin liðin þrjú, Afturelding, Grótta og HK eigi eftir leiki þá eiga þau ekki möguleika á að jafna Stjörnuna að stigum.
Í kvöld vann Stjarnan nauman sigur á Grill66-deildarliði Gróttu, 25:24, í Mýrinni í Garðabæ. Lítið er vitað annað um viðureignina en að Gróttuliðinu tókst að veita Stjörnunni verðuga keppni að þessu sinni. Ljóst virðist að Gunnar Gunnarsson, sem tók við þjálfun Gróttu í sumar, virðist á réttri leið. Verður spennandi að fylgjast með keppninni í Grill66-deild kvenna á komandi leiktíð þar sem fimm öflug lið virðast til alls líkleg.
Enga tölfræði er að finna frá leiknum í Mýrinni í kvöld, ekkert frekar en af viðureign HK og Stjörnunnar í sama móti sem fram fór á þriðjudaginn og er ennþá með óskráð úrslit í mótakerfi Handknattleikssambands Íslands.
Staðan:
| Stjarnan | 3 | 3 | 0 | 0 | 88 – 80 | 6 |
| Afturelding | 2 | 1 | 0 | 1 | 55 – 58 | 2 |
| Grótta | 1 | 0 | 0 | 1 | 24 – 25 | 0 |
| HK | 2 | 0 | 0 | 2 | 56 – 60 | 0 |
Næsti leikur í UMSK-mótinu verður á þriðjudaginn þegar Grótta og HK mætast í Kórnum klukkan 17.30.
- Auglýsing -
