„Að finna það hvernig er að vera hér og í kringum toppliðin og taka þátt í bikarhelginni. Það er sennilega fyrst og fremst sá lærdómur sem ég dreg út úr þessari þátttöku. Ég er hér í fyrsta sinn sem þjálfari og stelpurnar allar eru í fyrsta sinn að minnsta kosti í stórum hlutverkum,“ segir Júlíus Þórir Stefánsson þjálfari Gróttu spurður hvaða lærdóma hann tæki með sér af þátttökunni í bikarkeppninni en Grótta tapaði fyrir Haukum, 31:21, í undanúrslitaleik í Poweradebikarkeppni kvenna í handknattleik á Ásvöllum í kvöld.
Mikill munur er á Haukum og Gróttu í Olísdeildinnni, ríflega 20 stig, þar með e.t.v. ekki útilokað að á brattann yrði að sækja fyrir Seltirninga. Engu að síður gekk nokkuð vel í fyrri hálfleik þótt munurinn, 12:9, hafi verið meiri en Júlíus Þórir gerði sér vonir um þegar flautað var til leiks.
„Ég lagði upp með að okkur tækist að halda eins lengi í boltann og hægt var og tapa sem fæstum boltum. Það gekk upp lengi vel og við töpuðum boltanum bara einu sinni í fyrri hálfleik. Ég er því nokkuð stoltur af fyrri hálfleik,“ sagði Júlíus Þórir og bætti við.
„Síðan var tíu mínútna kafli snemma í fyrri hálfleik mjög erfiður. Þá skildu leiðir,“ sagði Júlíus Þórir.
„Svo var viðbúið að Haukar vildu gera betur í síðari hálfleik en í þeim fyrri. Þær ætluðu sér að koma inn í hálfleikinn og keyra á okkur og gerðu það. Kudos á þær.“
Lengra viðtal við Júlíus Þórir er á myndskeiði ofar í þessari frétt.
Haukar í úrslit eftir sjö ára bið – síðast var Stefán hinum megin við borðið
