Ísland leikur í kvöld til úrslita þriðja árið í röð á Sparkassen-cup móti 18 ára landsliða karla í handknattleik í kvöld eftir sigur á Portúgal í hörkuleik, 31:28, sem lauk í hádeginu. Íslenska liðið leikur við þýska landsliðið í úrslitaleiknum í kvöld. Þýskaland vann Slóveníu, 31:26, í hinni viðureign undanúrslita. Portúgal og Slóveníu eigast við í leik um þriðja sætið.
Í jöfnum og spennandi leik í morgun náðu íslensku piltarnir að knýja fram sigur á síðustu mínútunum eftir að hafa stigið krappan dans. Munaði þar ekki minnst um að varnarleikurinn þéttist og Eyjapeyinn Sigurmundur Gísli Unnarsson markvörður varði mikilvæg skot.
Staðan var jöfn í hálfleik, 17:17, og jafnt á öllum tölum allt þar til um fimm mínútur voru til leiksloka er íslenska liðið stakk sér fram úr með góðum endaspretti.
Íslensku piltarnir hafa unnið allar fjórar viðureignir sínar á mótinu til þessa. Sigurinn á portúgalska liðinu var sá naumasti af fjórum.
Mörk Íslands: Anton Frans Sigurðsson 6/3, Alex Unnar Hallgrímsson 5, Ómar Darri Sigurgeirsson 5, Brynjar Narfi Arndal 4, Patrekur Smári Arnarsson 4, Bjarki Snorrason 3, Freyr Aronsson 3, Örn Kolur Kjartansson 1.
Varin skot: Sigurmundur Gísli Unnarsson 9, Anton Máni Francisco Heldersson 4.
Piltarnir eru farnir til Þýskalands
Öruggur sigur á Slóvenum í fyrsta leiknum í Merzig
Miklir yfirburðir og 12 marka sigur á Austurríki
Annar stórsigur í dag – undanúrslit í fyrramálið
Piltarnir mæta portúgalska landsliðinu í undanúrslitum
- Allir leikir mótsins eru sýndir í beinni útsendingu gegn gjaldi: https://handball-globe.tv/sparkassencup-merzig
