Syrtir í álinn hjá Íslendingum

Enn syrtir í álinn hjá danska úrvalsdeildarliðinu Vendsyssel sem landsliðskonurnar Elín Jóna Þorsteinsdóttir og Steinunn Hansdóttir leika með. Í dag tapaði liðið sínum átjánda leik í dönsku úrvalsdeildinni þegar það tók á móti Århus United, 25:24. Fátt virðist því miður getað komið í veg fyrir að Vendsyssel falli úr deildinni en þegar tvær umferðir eru eftir er liðið með þrjú stig. Næsta lið fyrir ofan er með sex stig. Eitt lið fellur rakleitt úr deildinni.

Eins og í fleiri leikjum Vendsyssel upp á síðkastið þá gaf liðið eftir á lokakaflanum eftir að hafa verið með forystu eða átt í fullu tré við andstæðinga sína lengi vel. Vendsyssel var marki yfir í hálfleik í dag, 12:11.

Elín Jóna stóð fyrir sínu og vel það eins í síðustu leikjum. Hún varði 11 skot, þar af eitt vítakast, og var með 33% hlutfallsmarkvörslu. Elín varði sérlega vel í fyrri hálfleik. Steinunn skoraði í tvígang úr fjórum tilraunum.