„Nú tekur við hefðbundnari handknattleik í milliriðlum gegn Sviss, Frakklandi og Noregi. Leikirnir tveir gegn Alsír og Marokkó voru gríðarlega erfiðir sem tóku mjög á. Það er ekki einfalt að búa sig undir það óhefðbundna en okkur tókst að komast mjög vel frá því þrátt fyrir að nokkrir leikmenn okkar hafi orðið illa fyrir barðinu á leikmönnum Marokkó en sem betur fer virðast það ekki ætla að draga dilk á eftir sér,“ sagði Guðmundur Þórður Guðmundsson, landsliðsþjálfari í handknattleik í gær og var þá vitanlega kominn á fullt að undirbúa landsliðið fyrir leikinn við Sviss í dag.
„Svissneska liðið hefur leikið afar vel að undanförnu og aðeins vantaði herslumun upp á að það ynni Frakka í lokaleik síns riðils hér á mótinu á mánudagskvöld. Svisslendingarnir leika mjög mikið sjö á sex og þá sem fyrr er Andy Schmid í aðalhlutverki með sína sendingar auk skotanna. Við þurfum að búa okkur mjög vel gegn honum. Þess utan eru leikmenn liðsins mjög sterkir líkamlega og með góða vörn.
Þess vegna verðum við að fá talsvert af skotum utan af velli til þess að létta á sóknarleiknum. Það verður ekki alltaf auðvelt að opna vörnina þeirra.
Til viðbótar verðum við að nýta hraðaupphlaup okkar mikið betur en við höfum gert fram til þess á mótinu. Í þeim efnum eigum við verk að vinna, finnst mér. Mín skoðun er að við förum of hægt fram leikvöllinn í hraðaupphlaupum, alltof mikið er að menn stingi niður boltanum. Yfir það verðum að fara mjög vel á þeim stutta tíma sem er til undirbúnings,“ sagði Guðmundur sem ásamt Gunnari Magnússyni var vakandi fram til klukkan fimm í fyrrinótt við að fara yfir leik svissneska landsliðsins og þess íslenska. Það er í mörg horn að líta eins og alltaf á stórmótum,“ sagði Guðmundur Þórður Guðmundsson.
Bætir ekki við mönnum
Aðspurður sagðist hann ekkert vera að velta fyrir sér að bæta 20. manninum í leikmannahópinn í stað Janusar Daða Smárasonar sem varð að hverfa frá mótinu vegna axlarmeiðsla.
