„Seinni hálfleikur var frábær af okkar hálfu og uppbót fyrir fyrsta korterið í leiknum þegar við virtumst ekki vera mættir til leiks,“ sagði Ísak Gústafsson leikmaður Vals í samtali við handbolta.is í kvöld eftir að Valur vann RK Bjelin Spacva Vinkovci, 34:25, í fyrri viðureign liðanna í forkeppni Evrópudeildarinnar í handknattleik karla í N1-höllinni á Hlíðarenda.
Kveikti í mönnum
„Það sem hjálpaði okkur best í gang í síðari hálfleik var Bjöggi. Hann fór að fór að verja allt hvað af tók, marga í röð snemma í síðari hálfleik. Það kveikti í mönnum og var fljótt að smita út frá sér. Um leið og vörnin hrökk í gang þá fengum við hraðaupphlaupin sem gerðu alveg út af við Króatana. Við erum mikið fljótari,“ sagði Ísak sem var þrátt fyrir sigurinn hugsi yfir fyrri hálfleiknum sem var framan af afleitur hjá Valsmönnum. RK Bjelin Spacva Vinkovci skoraði til að mynda sex fyrstu mörkin og sjö af átta.
Skilur ekki hvað gerðist
„Ég skil bara ekki hvað gerðist hjá okkur framan af leiknum. Það er engin afsökun að vera með nokkra nýja leikmenn sem eru ekki komnir inn í allt hjá okkur. Valur er bara þannig félag að menn mæta þangað klárir í slaginn. Við stöndum ekki fyrir svona frammistöðu sem við sýndum framan af fyrri hálfleik. Hún má ekki endurtaka sig,“ sagði Ísak sem fer hvergi banginn í síðari leikinn eftir níu marka sigur í dag. Hann telur sigurinn muni duga til að Valur komist í riðlakeppnina.
„Þetta dugir okkur. Ég er alveg viss,“ sagði Ísak um leið og hann tók á sprett inn í klefa til að funda með Óskari þjálfara og félögum.
Sjá einnig: Framúrskarandi síðari hálfleik færði Val níu marka sigur
