Þóra María Sigurjónsdóttir hefur skrifað undir nýjan tveggja ára samning við handknattleiksdeild Gróttu. Þóra María er leikstjórnandi og kom til Gróttu frá HK síðastliðið sumar. Hún var óheppin með meiðsli í haust og missti af þónokkrum leikjum.
„Þóra er frábær leikstjórnandi og öflugur alhliða leikmaður. Það er því gleðiefni að hún verði hjá okkur næstu árin,“ sagði Sigurjón Friðbjörn Björnsson þjálfari Gróttuliðsins í tilkynningu sem barst frá Gróttu í kvöld.
Í eldlínunni á sunnudag
Þóra María verður væntanlega í eldlínunni með Gróttu í síðasta leik liðsins í Grill 66-deildinni á sunnudaginn. Grótta tekur þá á móti Víkingi í Hertzhöllinni á Seltjarnarnesi. Flautað verður til leiks klukkan 16.
Eftir deildarkeppnina tekur við umspilskeppni meðal liðanna í Grill 66-deildinni um sæti í Olísdeildinni á næstu leiktíð.
