Hægri hornamaðurinn, Þorgeir Bjarki Davíðsson, hefur skrifað undir tveggja ára samning við Gróttu og gengur til liðs við félagið að þessu leiktímabili loknu. Þetta kemur fram í tilkynningu frá Gróttu í kvöld. Þorgeir Bjarki er að ljúka sínu öðru keppnistímabili með Íslands- og bikarmeisturum Vals.
Þorgeir Bjarka þekkja flestir Seltirningar, segir í tilkynningu frá Gróttu. Hann er uppalinn Gróttumaður og lék með öllum yngri flokkum félagsins og síðan meistaraflokki. Hann lék með öllum yngri landsliðum Íslands.
Þorgeir Bjarki er örvhentur leikmaður og spilar aðallega í hægra horninu en getur einnig leikið sem skytta. Hann hefur leikið 79 leiki fyrir Gróttu og skorað í þeim 138 mörk.
Þorgeir er 25 ára gamall og hefur á síðustu árum leikið með Fram, HK og Val eftir að hann yfirgaf Gróttu fyrir sex árum.
„Ég er mjög spenntur að snúa aftur í Gróttu eftir sex ára fjarveru. Ég hef mikla trú á hópnum og þjálfarateyminu og markmiðum þeirra. Það hefur mikið tilfinningalegt gildi fyrir mig að koma heim til uppeldisfélagsins og gera mitt besta til að styrkja hópinn fyrir næstu leiktíð,“ segir Þorgeir Bjarki Davíðsson í tilkynningu sem barst frá Gróttu í kvöld.
