Ekkert lát er á sigurgöngu Þorsteins Léos Gunnarssonar og samherja hans í FC Porto þegar kemur að leikjum í portúgölsku 1. deildinni í handknattleik. Porto vann Marítimo í gær með 13 marka mun á útivelli, 40:27. Þetta var tíundi sigur Porto í deildinni og stendur liðið jafnt meisturum síðasta árs, Sporting Lissabon, að stigum. Stórleikur er í uppsiglingu á laugardaginn þegar Sporting sækir Porto heim í Dragão Arena í 11. umferð deildarinnar.
Skoraði þrisvar
Þorsteinn Leó skoraði þrjú mörk í sigurleiknum í gær en leikjaálagið dreifðist nokkuð á milli mála. Næsti leikur Porto verður á heimavelli gegn HC Vardar í 4. umferð riðlakeppni Evrópudeildarinnar á þriðjudagskvöld.
Stiven á sigurbraut
Stiven Tobar Valencia skoraði fimm mörk fyrir Benfica í öruggum sigri á CF OS Belenenses á útivelli í gær, 35:26. Benfica gerði út um leikinn í fyrri hálfleik með 22 mörkum. Benfica er í þriðja sæti rétt á eftir Sporting og Porto.
Benfica á einnig heimaleik í Evrópudeildinni á þriðjudaginn. Liðið fær meistaralið Slóvakíu, Tatran Presov í heimsókn.
Benfica hefur unnið þrjá fyrstu leiki sína í C-riðli Evrópudeildar.
19 marka munur
Eins og kom fram á handbolti.is í gær þá unnu Orri Freyr Þorkelsson og samherjar í Sporting Lissabon lið Nazaré Dom Fuas AC, 42:23, á föstudagskvöld. Orri Freyr skoraði tvö mörk. Sporting sækir PSG heim til Parísar á miðvikudaginn áður farið verður í toppslaginn í Porto á laugardaginn.
