Aron Kristjánsson landsliðsþjálfari Kúveit býr lið sitt undir Asíukeppnina sem fram fer í Kúveit síðar í mánuðinum. Kúveitar eru í æfingabúðum í Evrópu. Þeir steinlágu fyrir Slóvenum í Trebnje í Slóveníu í kvöld, 36:23.
Asíumeistaramótið hefst 15. janúar í hafnarborginni Sabah Al-Salem í Kúveit. Fjórar efstu þjóðir mótsins, sem lýkur 29. janúar, öðlast þátttökurétt á HM í Frakklandi og Þýskalandi eftir ár.
Eftir því sem næst verður komist á Kúveit a.m.k. einn leik eftir í Evrópu á næstu dögum en til stendur að mæta Georgíumönnum í vináttuleik í Slóveníu.
Aron tók við þjálfun landsliðs Kúveit í mars á síðasta ári eftir að hafa hætt hjá Barein eftir HM í Króatíu, Danmörku og Noregi. Aron hafði þá verið landsliðsþjálfari Barein meira og minna í sex ár.
