Afturelding vann ungmennalið HK, 27:24, í Grill 66-deild kvenna í handknattleik að Varmá í gær og hafði þar með sætaskipti við HK-liðið. Afturelding hefur unnið þrjá leiki í röð og er komin í fjórða sæti deildarinnar með sex stig að loknum fimm leikjum og ljóst að Guðmundur Helgi Pálsson er góðri leið með liðið.
Ungmennalið HK er í fimmta sæti með fjögur stig eftir að hafa lokið fimm leikjum.
Leikurinn var lengi vel í járnum og aðeins munaði einu marki þegar fyrri hálfleikur var að baki, 14:13. Aftureldingarliðið var sterkara þegar kom fram á endasprettinn og vann með þriggja marka mun.
Næsti leikur Aftureldingar verður gegn Selfossi í Hleðsluhöllinni á Selfossi á sunnudaginn.
![](https://www.handbolti.is/wp-content/uploads/2021/02/aftue2-1024x642.jpg)
Þar sem níu lið eru í deildinni situr eitt yfir í hverri umferð. Í næstu umferð kemur það í hlut Gróttu að sitja yfir.
Mörk Aftureldingar: Anamaria Gugic 7, Birna Lára Guðmundsdóttir 5, Ragnhildur Hjartardóttir 4, Katrín Helga Davíðsdóttir 2, Susan Ines Gamboa 2, Þórhildur Vala Kjartansdóttir 2, Andrea Ósk Þorkelsdóttir 1, Brynja Rögn Ragnarsdóttir 1, Drífa Garðarsdóttir 1, Úlfhildur Tinna Lárusdóttir 1, Telma Rut Frímannsdóttir 1.
Mörk HK: Sara Katrín Gunnarsdóttir 8, Heiðrún Berg Sverrisdóttir 8, Ólöf Ásta Arnþórsdóttir 4, Brynja Katrín Benediktsdóttir 2, Lovísa Líf Helenudóttir 2.
![](https://www.handbolti.is/wp-content/uploads/2021/01/stadan-grillkvenna-1024x576.jpg)