Tryggvi Garðar Jónsson leikmaður Íslands- og bikarmeistara Vals sleit sin í baugfingri hægri handar í viðureign Flensburg og Vals í Evrópudeildinni. Síðan er liðin rúm vika og talið er sennilegt að Tryggvi verði ekki kominn á ferðina aftur með Valsliðinu fyrr en í fyrsta lagi eftir þrjár vikur, jafnvel geta liðið fimm vikur í endurkomu á völlinn.
Einnig kom brot í fingurinn. Grunur leikur á að fingurinn hafi farið úr lið.
Síðan þetta gerðist hefur Tryggvi Garðar misst af tveimur leikjum Valsliðsins. „Meiðslin koma á slæmum tíma, bæði fyrir hann og liðið. Hlutverk Tryggva fór vaxandi,“ sagði Snorri Steinn Guðjónsson þjálfari Vals í samtali við handbolta.is.
Auk Tryggva Garðars er Róbert Aron Hostert frá vegna brjóskloss í hálsi eins og áður hefur komið fram. Einnig er hinn efnilegi Ísak Logi Einarsson úr leik um skeið. Hann handarbrotnaði í leik með U-liði Vals gegn KA U í Grill 66-deildinni fyrir nokkru.
