Heimir Ríkarðsson og Maksim Akbachev, þjálfarar 19 ára landsliðs karla í handknattleik hafa þurft að gera tvær breytingar á landsliðshópnum sem þeir völdu á dögunum til þátttöku á Sparkassen Cup sem fram fer í Þýskalandi 26. – 30. desember.
Ævar Smári Gunnarsson úr Aftureldingu meiddist og verður þar af leiðandi ekki með við æfingar næstu daga né fer hann til Þýskalands. Í hans stað hefur ÍR-ingurinn Bernard Kristján Owusu Darkoh verið kallaður inn í hópinn. Bernard var eins og Ævar Smári í 18 ára landsliðinu sem hafnaði í fjórða sæti á EM í ágúst.
Auk Ævars Smára varð Framarinn Marel Baldvinsson að draga sig út úr hópnum. Bessi Teitsson úr Gróttu var valinn í stað Marels. Bessi hefur vakið mikla athygli í síðustu leikjum Gróttu í Olísdeildinni og í Poweradebikarnum.
U19 ára landsliðið kemur saman á morgun og verður við æfingar um helgina.
Sparkassen Cup verður að þessu sinni haldið í 36. skipti. Auk landsliða Þýskalands og Íslands hafa landslið Slóveníu, Hollands, Sviss og Serbíu boðað komu sína. Að vanda tekur úrvalslið sambandslandsins Saarlands þátt en mótið fer að venju fram í Merzig í Saarlandi. Egyptar ætluðu að vera með en hættu skyndilega við þátttöku á dögunum. Þess í stað stillir Þýskaland upp tveimur landsliði á mótinu.
U19 ára landslið Íslands tekur þátt í heimsmeistaramótinu sem fram fer í Egyptalandi í ágúst á næsta ári.
