- Auglýsing -
Handknattleikskonurnar Helena Rut Örvarsdóttir og Eva Björk Davíðsdóttir hafa framlengt samninga sína við Stjörnuna til tveggja ára, fram til loka keppnistímabilsins 2024. Þær stöllur gengu til liðs við Stjörnuna sumarið 2020 eftir að hafa leikið um árabil utan landsteina Íslands.
Helena Rut er ein leikreyndasta handknattleikskona landsliðsins um þessar mundir. Hún er uppalin í Stjörnunni en gekk til liðs við Byåsen Håndball Elite í Noregi 2017. Eftir veru í Noregi var Helena Rut um skeið með JDA Dijon í Frakklandi og í herbúðum SønderjyskE í Danmörku. Helena Rut á að baki 82 landsleiki. Hún er næst markahæsti leikmaður Stjörnunnar í Olísdeildinni á leiktíðinni með 83 mörk í 18 leikjum.
Eva Björk kom til Stjörnunnar frá Skuru IK í Svíþjóð fyrir tveimur árum. Eva Björk lék með Gróttu til ársins 2016 þegar hún fór til Sola í Noregi. Eftir veruna þar gekk Eva Björk til liðs við Ajax í Kaupmannahöfn og var síðast hjá Skuru IK hinum megin við Eyrarsundið. Eva Björk hefur leikið 34 A-landsleiki.
Eva Björk er markahæsti leikmaður Stjörnunnar á keppnistímabili með 97 mörk í 17 leikjum.
Báðar verða í eldlínunni í dag þegar Stjarnan sækir ÍBV heim í 19. umferð Olísdeildar kvenna í handknattleik.
- Auglýsing -
