U17: Annað tap í Zvolen

Íslensku piltarnir í U17 ára landsliði karla í handknattleik tapaði með níu marka mun fyrir Spánverjum í þriðju og síðustu umferð í B-riðli á Ólympíuhátíð Evrópuæskunnar í Zvolen í Slóvakíu í dag. Lokatölur, 34:25. Spænsku piltarnir voru fimm mörkum yfir að loknum fyrri hálfleik, 16:11.

Þar með lauk íslenska liðið leik í riðlakeppninni með einum sigri á Króötum og tveimur töpum, fyrir Dönum og Spánverjum. Ljóst er að íslenska liðið leikur ekki til undanúrslita.

Í kvöld, þegar öllum leikjum verður lokið í riðlakeppninni, skýrist hvaða liði íslensku piltarnir mæta á föstudaginn og mun handbolti.is segja frá því um leið og einnig birta lokastöðu riðlanna auk allra úrslita dagsins.

Mörk Íslands: Gísli Rúnar Jóhannsson 5, Bjarki Jóhannsson 4, Arnþór Sævarsson 3, Eiður Rafn Valsson 3, Andri Clausen 3, Daníel Stefán Reynisson 2, Kristófer Stefánsson 2, Örn Alexandersson 1, Patrekur Guðmundsson 1, Ívar Bessi Viðarsson 1.