HSÍ reynir þessa daga að fá undanþágu fyrir leikmenn íslenska landsliðsins í handknattleik til að þeir geta hafið æfingar á milli jóla og nýárs án þess að þurfa að sæta einangrun sem útilokar þá frá samneyti við fjölskyldur sínar yfir áramótin.
Guðmundur Þórður Guðmundsson, landsliðsþjálfari í handknattleik karla, sagði á blaðamannafundi í morgun undanþáguna vera afar mikilvæga fyrir undirbúninginn vegna leikjanna við Portúgal í undankeppni EM 6. og 10. janúar og ekki síður vegna þátttökunnar á heimsmeistaramótinu.
„Von mín er að við fáum undanþágu til að æfa á milli jóla og nýárs og að leikmenn hefðu um leið tök á að njóta samvista með fjölskyldum sínum um áramótin. Undanþágan væri ómetanleg fyrir framhaldið hjá okkur,“ sagði Guðmundur Þórður.
sérstakt að við mætum Portúgal þrisvar sinnum á níu dögum í þremur löndum
Án undanþágunnar hefjast æfingar ekki fyrr en síðdegis 2. janúar að undangenginni skimun um morguninn og bið eftir niðurstöðum. „Það er gríðarlega mikilvægt að hægt verði að verða við beiðni okkar og skrifstofa HSÍ vinnur í því um þessar mundir.
Ef undanþágan fæst ekki þá hef ég miklar áhyggjur af undirbúningnum. Hann verður þá mjög stuttur og erfiður. Fyrst æfing yrði seinni partinn 2. janúar. Síðan myndum við æfa daginn eftir en þann fjórða verðum við að fara út til Portúgal,“ sagði Guðmundur Þórður en fleira brennur á honum um þessar mundir. Heimferðin frá Portúgal verður þung í vöfum og gæti stytt undirbúningstímann fyrir HM um einn dag.
Millilending með gistingu
„Einnig hef ég sérstakar áhyggjur af ferðalagi okkar aftur heim til Íslands þann 7. janúar. Það gæti reynst okkur mjög erfitt. Svo kann að fara að við verðum að gista á leiðinni. Þar með myndum við missa af mjög mikilvægum degi í undirbúningi fyrir síðari leikinn við Portúgal og fyrir HM um leið,” sagði Guðmundur Þórður.
Með ólíkindum
„Það er með ólíkindum að setja svona erfiða leiki á skömmu fyrir HM og það sem gerir málið enn verra er að það er ekki auðvelt að ferðast um Evrópu eins og ástandið er.
Það er mjög sérstakt að sjá þessa leikjadagskrá sem framundan er þar sem við mætum Portúgal þrisvar sinnum á níu dögum í þremur löndum. Það er ekki einfalt mál á Covid-tímum. Við munum gera okkar besta í stöðunni sem ekki er auðveld viðureignar,“ sagði Guðmundur Þórður Guðmundsson, landsliðsþjálfari í handknattleik karla á blaðamannafundi í morgun.
Hægt er að hlusta á blaðamannafundinn í heild hér að neðan.
