„Þetta var bara alls ekki gott,“ sagði Patrekur Jóhannesson þjálfari kvennaliðs Stjörnunnar eftir níu marka tap liðsins, 30:21, fyrir Gróttu í 19. umferð Olísdeildarinnar í Hertzhöllinni á Seltjarnarnesi í kvöld. Eftir tapið er Stjarnan aðeins tveimur stigum á eftir Gróttu sem rekur lestina í Olísdeildinni þegar svo gott sem tvær umferðir eru eftir að viðbættum einum leik.
„Varnarleikurinn var skelfilegur og þess vegna hjálpuðum við markverðinum okkur lítið,“ sagði Patrekur og bætti við. „Við náðum að koma okkur aðeins inn í leikinn þegar á leið fyrri hálfleik en það nægði ekki.“
Hélt að annað myndi bregðast
„Ég á bara hreinlega erfitt með að útskýra og sætta mig við að í svona leik séum við svona soft í vörninni. Það kom mér verulega á óvart. Ég hélt að annað myndi bregðast okkur. Þótt sóknarleikurinn bregðist þá eiga leikmenn að geta gert mikið betur varnarlega,“ sagði Patrekur.
Ennþá í fallhættu
Stjarnan á tvo leiki eftir í Olísdeildinni, gegn Selfossi og Val. Vinni ÍBV Selfoss á morgun þá færist Stjarnan niður í sjöunda og næst síðasta sæti fyrir tvær síðustu umferðirnar.
„Það vissu allir um mikilvægi þessa leiks. Gróttuliðið var beittara og mikið tilbúnara í slaginn. Við vorum bara ekki til staðar. Hver skýringin er á því veit ég hreinlega ekki,“ sagði Patrekur Jóhannesson þjálfari Stjörnunnar í samtali við handbolta.is í Hertzhöllinni á Seltjarnarnesi í kvöld.
Lengra viðtal við Patrek er að finna í myndskeiði hér fyrir ofan.
Staðan og næstu leikir í Olísdeildum.
Ætlum að vinna Val og ÍR og halda sæti okkar
