Margt bendir til þess að þráðurinn verði ekki tekinn upp að nýju á Íslandsmótinu í handbolta fyrr en í fyrsta lagi í byrjun desember. Hertar sóttvarnaaðgerðir eru í farvatninu. Þótt ég viti ekkert hvað stendur í minnisblaði sóttvarnalæknis þá er alveg hægt að útiloka að heimilt verði að hefja keppnisíþróttir á ný næstu tvær til þrjár vikur, hið minnsta.
Hvað tekur við þegar keppni hefst aftur, hvenær sem það verður? Svarið veit enginn enda ekkert fararsnið á kórónuveirunni. Alltént er óskandi að hún gjósi ekki upp af sama krafti og nú einu sinni eða tvisvar á fyrri hluta næsta árs. Hver veit samt? Veiran virðist eins og falinn eldur sem engin leið er að kæfa.
Íþróttafélög landsins hafa orðið harkalega fyrir barðinu á ástandinu eins og margir aðrir. Tekjutap er mikið, allt upp í 60-70% tekjufall hjá handknattleiksdeildum síðan í mars.
Einn góðan veðurdag
Þess vegna veitir félögum ekki af því að krækja í hverja krónu sem hægt verður að nálgast þegar ástandið batnar sem gerist einn góðan veðurdag. Spurningin er bara hvenær. Margir horfa til ríkisvaldsins. Vissulega á það að hlaupa undir bagga en víst er að það getur aldrei og mun ekki geta bætt allan skaðann sem orðið hefur, og á eftir að verða.
Með von um að ástandið verði orðið bærilegt þegar kemur fram á næsta vor eða sennilega sumar skora ég á Handknattleikssamband Íslands velta upp öllum kostum sem koma til greina með félögunum. Til dæmis að breyta úrslitakeppninni í Olísdeild kvenna þar sem átta lið eru. Tilkynnið félögunum átta að átta liða úrslitakeppni verði eftir deildarkeppnina í stað sex liða. Um leið verður ákveðið að ekkert lið falli úr Olísdeild kvenna.
Ná í fleiri krónur
Átta liða úrslitakeppni gæfi félögunum möguleika á að nálgast tekjur af sölu aðgangseyris, í einhverjum tilfellum með aukinni áherslu á veitingasölu og hugsanlega einnig með sölu á varningi eins og bolum og treflum, svo dæmi sé tekið. Í þessum efnum mega reyndar sum félög gera mikið betur, ekki síst þau sem hafa yfir að ráða rúmgóðum keppnishúsum.
Með því að ákveða að ekkert lið falli úr Olísdeild kvenna væri liðunum rétt regnhlíf til þess skjóls. Það væri síðan komið undir þeim að fá sem mest út úr því. Um leið væri mögulegt að skipuleggja starfið næsta árið auðvitað með þá von í brjósti að áhrif veirunnar minnki.
Níu liða deild í eitt tímabil
Þótt ekkert lið félli úr Olísdeild kvenna í lok keppnistíðarinnar hvenær sem það verður þá færðist sigurlið Grill 66-deildar kvenna upp í Olísdeild. Ekkert er að því að hafa níu lið í Olísdeild kvenna eitt tímabil. Eitt lið sæti yfir í hverri umferð. Þjóðverjar fóru þess leið t.d. í 2. deild karla í vor. Nú eru 19 lið í deildinni en þeim verður fækkað niður í 18 eftir núverandi keppnistímabil. Þá eru 13 lið nú í úrvalsdeild kvenna í Noregi. Dæmin eru fleiri.
Þar með væru níu lið í Olísdeildinni leiktíðina 2021-2022. Vorið 2022 féllu tvö og þriðja neðsta liðið færi í hefðbundið umspil. Haustið 2022 væri þá aftur lagt af stað með átta liða Olísdeild.
Veltum upp fleiri kostum
Ekkert að því að gera undanþágur, breyta fyrirkomulagi til að freista þess að búa til ramma sem getur létt undir með liðunum. Nú um stundir eiga menn að þora að hugsa út fyrir rammann og velta öðrum kostum fyrir sér. Kannski tækist með þessu að koma á einhverri festu næsta árið og þar með styrkja stoðir kvennahandboltans. Og hugsanlega er líka bara til allt önnur og mikið betri leið en þessi. Einhver sem við höfum ekki ennþá komið auga á.
Hvað með neðri hlutann?
Hvort hægt sé að gera eitthvað vegna Olísdeildar karla er íhugunarefni. Er hægt að búa til úrslitakeppni um að forðast fall, svipað og Danir eru með og blanda þá inn í einu eða tveimur liðum úr Grill 66-deildinni? Búa til viðburð sem gæti gefið félögunum eitthvað í aðra hönd þannig að handboltafólk utan vallar sem innan geti kvatt tímabilið og vonandi veiruna, brosað út í annað, og sagt um leið og það gengur inn í sumarið; við alltént reyndum.
Ívar Benediktsson, [email protected]
