Viktor Lekve þjálfari færeyska úrvalsdeildarliðsins KÍF frá Kollafirði fór vel af stað í færeysku bikarkeppninni í gærkvöld. KÍF vann StÍF, 33:29, í Høllin á Skála, eftir að hafa verið fjórum mörkum yfir í hálfleik, 17:13.
Leikmenn KÍF lögðu grunn að sigrinum með frábærum leik fyrstu 25 mínúturnar þegar ekki stóð steinn yfir steini hjá liði StÍF.
Á fyrsta stigi bikarkeppninnar í Færeyjum er leikið í tveimur fjögurra liða riðlum. Tvö efstu lið hvers riðils taka sæti í undanúrslitum. Næsti leikur KÍF verður við Kyndil í Þórshöfn 19. nóvember
Benedikt Emil Aðalsteinsson sem gekk til liðs við KÍF á dögunum skoraði ekki mark í leiknum. Fríði Weyhe var markahæstur með sjö mörk. Pauli Rasmussen var atkvæðamestur hjá StÍF með átta mörk.
Rautt spjald fyrir mistök
Viktor Lekve þjálfara KÍF var sýnt rauða spjaldið þegar níu sekúndur voru til leiksloka í gær. Mun það hafa verið á misskilningi byggt vegna mistaka dómara og starfsmanna ritaraborðsins í kjölfar uppnáms sem varð í herbúðum heimliðsins þegar óskað var eftir leikhléi.
