Viktor Gísli fór hamförum í fyrsta heimaleiknum – nærri 60% markvarsla

Viktor Gísli Hallgrímsson, landsliðsmarkvörður í handknattleik, fór hamförum í marki Orlen Wisla Plock í kvöld í fyrsta leik sínum fyrir félagið. Hann var með 57,1% hlutfallsmarkvörslu í stórsigri á heimavelli gegn KGHM Chrobry Głogów, 35:14. Staðan var 17:7 að loknum fyrri hálfleik.

Viktor Gísli var valinn maður leiksins.

Viktor Gísli, sem gekk til liðs við pólska meistaraliðið í sumar frá Nantes í Frakklandi, missti af fyrsta leiknum í deildinni um síðustu helgi. Hann kom þar af leiðandi af tvöföldum krafti inn í viðureignina á heimavelli í kvöld og stimplaði sig hressilega inn hjá stuðningsmönnum félagsins sem kættust vel.

Hér fyrir neðan er að finna myndir af Facebook-síðu Wisla Plock.