„Það tók okkur svolítinn tíma framan af að hrista þá af okkur. Hraðinn var ekki nægur hjá okkur auk þess sem færi fór forgörðum auk tæknifeila. Vörnin var góð og Viktor flottur í markinu. Við vissum að eftir því sem á leikinn myndi líða þá kæmumst við fram úr. Við vildum bara vinna og gera það sannfærandi. Það tókst,“ sagði Elvar Örn Jónsson landsliðsmaður í handknattleik í samtali við handbolta.is í Zagreb Arena í dag eftir níu marka sigur íslenska landsliðsins á Argentínu, 30:21, í síðustu umferð riðlakeppninnar.
„Okkur tókst að koma á fullu inn í síðari hálfleik og klára leikinn á fyrstu 10 til 15 mínútunum. Mér fannst okkur takast það,“ sagði Elvar Örn sem eins og aðrir leikmenn landsliðsins bíða eftir úrslitum úr síðari tveimur viðureignum kvöldsins í riðlakeppninni.
Lengra viðtal við Elvar Örn á myndskeiði hér fyrir ofan.
