„Þetta voru afar svekkjandi úrslit, ekki síst erum við vonsviknir yfir frammistöðu okkar í síðari hálfleik,“ sagði Einar Andri Einarsson annar þjálfara U20 ára landsliðs karla í samtali við handbolta.is eftir að íslenska liðið hafði tapaði með 10 marka mun fyrir Svíum í síðasta leiknum í F-riðli Evrópumóts landsliða í Lasko í Slóveníu í dag, 33:23. Þriggja marka munur var að loknum fyrri hálfleik, 15:12, Svíþjóð í vil. Svíar hrepptu efsta sæti riðilsins og þátttökurétt í átta liða úrslitum. Íslenska liðið verður hinsvegar að bíða þar til öllum leikjum riðlakeppninnar verður lokið í kvöld til þess að vita hvert framhald þess verður í keppninni.
Annað hvort tekur við keppni á meðal átta efstu eða þá um sæti níu til sextán og þar með baráttu um farseðil á heimsmeistaramótið í Póllandi að ári liðnu í flokki 21 árs landsliða.
Áttum í fullu tré
„Við áttum í fullu tréi við Svía í fyrri hálfleik og hefðum getað farið með jafna stöðu eða forskot inn í hálfleikshléið. Við fórum illa með færi undir lok hálfleiksins auk þess sem dómar féllu alls ekki með okkur. Á hinn bóginn var síðar hálfleikurinn alls ekki nógu góður. Ég dreg ekki fjöður yfir það að það var algjör óþarfi að tapa leiknum með tíu marka mun. Forsendur voru svo sannarlega fyrir hendi af okkar hálfu að vera með jafnari leik,“ sagði Einar Andri þungur á brún.
Góð vörn og markvarsla
„Svíarnir voru öflugir. Þeir voru mjög öflugir varnarlega og markverðirnir frábærir,“ bætti Einar Andri við.
Segja má að íslenska liðið hafi misst Svía framúr sér á fyrstu tíu mínútum síðari hálfleiks. Á þeim mínútum skoraði sænska liðið sex mörk gegn einu íslensku marki.
„Á þeim kafla fóru nokkur dauðafæri forgörðum hjá okkur til að halda okkur nær þeim. Síðari hálfleikur var vonbrigði af okkar hálfu,“ sagði Einar Andri sem fylgist grannt með síðustu leikjum í D og E-riðli en úrslit þeirra leikja, Noregur – Ungverjaland og Slóvenía – Danmörk hafa áhrif á það hvort íslenska liðið fer í átta liða úrslit eða leikur um sæti níu til sextán. Síðustu leikirnir hófust klukkan 17.
Tíu marka skellur fyrir Svíum á EM
EMU20 karla: Leikir, úrslit og staðan, riðlakeppni
