„Svo sannarlega gaman að enda þetta geggjaða mót með sigri í síðasta leiknum okkar saman. Við ætlum að leggja allt í þetta og gerðum það,“ sagði Rakel Oddný Guðmundsdóttir einn leikmanna 20 ára landsliðsins í samtali við handbolta.is í dag eftir að íslenska landsliðið vann Sviss í síðasta leik sínum á mótinu og tryggði sér um leið 7. sæti sem er besti árangur sem íslenskt kvennalandsliðs hefur nokkru sinni náð á stórmóti.
„Við vorum allar með tárin í augunum inni í klefa eftir leikinn. Þetta var síðasti leikurinn okkar saman. Við vorum staðráðnar í að njóta leiksins saman með gleði. Vonandi sýndum við áhorfendum það líka. Fólkið okkar í stúkunni var geggjað í dag og við viljum þakka þeim fyrir að mæta og styðja okkur,“ sagði Rakel Oddný sem er ein af tíu stúlkum í liðinu sem hefur verið með á öllum stórmótum frá 2021 þegar þá 17 ára landsliðið tók þátt í B-keppni Evrópumótsins í Litáen.
„Á góðum degi hefðum við átt að vinna þessar stelpur með fleiri mörkum en við unnum. Það skiptir máli að hafa gaman,“ sagði Rakel Oddný Guðmundsdóttir leikmaður Hauka og U20 ára landsliðs kvenna sem var skiljanlega eldhress í leikslok.
Lengra myndskeiðsviðtal er við Rakel Oddnýju efst í þessari frétt.
Sigur á Sviss í lokaleiknum – 7. sætið á HM í höfn
HMU20: Dagskrá og úrslit síðustu leikdagana
