„Mér fannst við vera sofandi í fyrri hálfleik og ekki nógu ákveðnir, ekki síst í vörninni,“ sagði vonsvikinn fyrirliði íslenska landsliðsins, Ómar Ingi Magnússon, eftir eins marks tap fyrir Króötum, 30:29, í Malmö Arena í dag í fyrstu umferð milliriðlakeppni Evrópumótsins í handknattleik karla.
„Okkur tókst ekki að aðstoða markverðina nógu vel í fyrri hálfleik og fyrir vikið fengum við alltof mörg mörk á okkur. Þetta atriði batnaði mjög mikið í síðari hálfleik en því miður var róðurinn orðinn þungur,“ sagði Ómar Ingi enn fremur.
„Það er hrikalega erfitt að elta Króatana og setja þá undir pressu. Meðan þeir eru yfir þá eru þeir góðir að halda fengnum hlut eins og sást í dag.
Við verðum að halda áfram og gera betur í næsta leik,“ sagði fyrirliðinn er handbolti.is hitti hann stuttlega að máli í leikslok.
Næsti leikur íslenska landsliðsins verður gegn Svíum á sunnudaginn klukkan 17.
