Þorsteinn Leó Gunnarsson og félagar í Porto fögnuðu í kvöld öðrum sigri sínum í portúgölsku 1. deildinni í handknattleik á keppnistímabilinu þegar þeir unnu stórsigur, með 20 marka mun, 42:22, á Vítoria SC í annarri umferð. Leikurinn fór fram á heimavelli Porto og voru yfirburðir liðsins algjörir.
Þorsteinn Leó, sem gekk til liðs við Porto í sumar, skoraði fjögur mörk í kvöld eins og hann gerði í fyrstu umferðinni. Þorsteinn Leó lét einnig til sín taka í vörninni og uppskar brottrekstur í tvær mínútur fyrir að ganga vasklega fram. Antonio Llamazares var markahæstur hjá Porto með 10 mörk. Diogo Oliveira var næstur með fimm mörk.
Skammt er stórra högga á milli hjá Porto. Næsti leikur í deildinni verður einnig á heimavelli þegar lið SC Horta kemur í heimsókn á laugardaginn.
Sjá einnig: Stiven og félagar fögnuðu sigri á Madeira
