Elmar Erlingsson og samherjar í þýska liðinu HSG Nordhorn-Lingen náðu að velgja Viktori Gísla Hallgrímssyni og nýjum liðsfélögum í Barcelona undir uggum í gær á hinu árlega handknattleiksmóti, Premium Cup, sem Nordhorn stendur fyrir. Eftir að hafa lent í kröppum dansi náði stórliðið frá Katalóníu að vinna með eins marks mun, 32:31.
Barcelona leikur til úrslita við þýska meistaraliðið Füchse Berlin í dag. Elmar og félagar mæta Flensburg.
Elmar skoraði tvö mörk í þremur skotum en hann lék fyrri hálfleikinn í viðureigninni við Barcelona.
Fyrsti leikur Viktors Gísla
Viktor Gísli varði mark Barcelona í síðari hálfleik og því áttust þeir landarnir aldrei við á leikvellinum. Eftir því sem næst verður komist var leikurinn í Lingen í gær sá fyrsti hjá Viktori Gísla fyrir Barcelona eftir að hann kom til Katalóníuliðsins í sumar.
Mikill stemning var á leiknum í Emsland-Arena í Lingen. Liðlega 2.600 áhorfendur létu vel til sín heyra.
Fücshe Berlin lagði Flensburg naumlega í hinni viðureign gærdagsins, 40:39.
