Svíinn Petter Strömberg hefur verið ráðinn þjálfari bandaríska karlalandsliðsins í handknattleik. Strömberg, sem hefur takmarkaða reynslu af þjálfun, tekur við af landa sínum. Robert Hedin sem gafst upp í vor eftir sjö ár hjá bandaríska handknattleikssambandinu og réði sig til landsliðs Barein.
Strömberg er ætlað að halda áfram með undirbúning bandaríska landsliðsins vegna þátttöku á Ólympíuleikunum í Los Angeles eftir þrjú ár.
Þýski landsliðsmaðurinn Tim Freihöfer hefur skrifað undir nýjan samning við þýska meistaraliðið Füchse Berlin. Nýi samningurinn er til fjögurra ára, út leiktíðina vorið 2029.
Handknattleiksþjálfarinn Jaron Siewert er sterklega orðaður við þjálfarastarfið hjá danska úrvalsdeildarliðinu HØJ á Sjálandi. Siewert var leystur frá störfum hjá Füchse Berlin í upphafi þessa mánaðar. HØJ vann sér sæti í dönsku úrvalsdeildinni í vor en þrátt fyrir að hafa marga vaska leikmenn innan sinna raða hefur ekki gengið sem skyldi til þessa.
Ef marka má orðróm þessa dagana þá eru fleiri öflugir leikmenn væntanlegir fyrir næstu leiktíð. Mikill hugur er í forráðamönnum HØJ.
