„Þessi sigur er ekki smá sætur. Ég er í spennufalli þó hef ég gengið í gegnum svona sigra nokkrum sinnum með Fram en þetta er eitthvað allt annað og nýtt,“ sagði Unnur Ómarsdóttir leikmaður nýkrýndra Coca Cola-bikarmeistara Fram í handknattleik kvenna við handbolta.is í gær eftir að KA/Þórsliðið vann Fram örugglega í úrslitaleik, 26:20.
Unnur gekk til liðs við KA/Þór í sumar eftir að hafa leikið um árabil með Fram og Gróttu auk tímabils í Noregi. Hún segir það vera aðra tilfinningu að vinna bikarinn með KA/Þór enda er KA hennar uppeldisfélag.
„Ég hef aldrei unnið bikar með KA, þetta er hreinlega súrrealískt,“ sagði Unnur sem skoraði sex mörk í leiknum í gær, flest eftir hraðaupphlaup, sem KA/Þórsliðið var óspart að nýta sér hvenær sem tækifæri gafst.
„Við unnum mjög vel til baka í vörninni og náðum að stöðva hraðaupphlaup Fram en liðið lifir mjög á þeim. Þetta var eitt lykilatriði í að okkur tókst að vinna Framliðið. Ég átti alltaf von á að Framarar kæmu til baka en það varð einhvern veginn aldrei að því. Leikurinn var okkar meginn allan tímann.
Það er bara æðislegt fá að taka þátt í þessu ævintýri með stelpunum og fara með bikarinn norður í fyrsta sinn. Þetta er hreinlega æðislegt,“ sagði sigurglöð Unnur Ómarsdóttir, nýkrýndur bikarmeistari með KA/Þór.
Meiri umfjöllun um úrslitaleik KA/Þórs og Fram:
Frábær byjun.
Þær voru mikið betri.
Mættum eins og stríðsmenn.
Bikarinn fer norður.
Textalýsing.
