Íslenska landsliðið í handknattleik karla, skipað leikmönnum 19 ára og yngri, hafnaði í C-riðli þegar dregið var í riðla á heimsmeistaramótinu í handknattleik sem fram fer í Króatíu frá 2. til 13. ágúst í sumar.
Íslenska liðið var í öðrum styrkleikaflokki og fékk Afríkumeistara Egyptalands úr fyrsta styrkleikaflokki og Japan og Tékkland úr þriðja og fjórða flokki.
Íslensku piltarnir unnu Egypta, 32:27, á alþjóðlegu móti, Sparkassen cup, í Merzig í Þýskaland á milli jóla og nýárs.
Alls verður leikið í átta fjögurra liða riðlum og komast tvö áfram úr hverjum í 16-liða úrslitum en hin sextán liðin leika um forsetabikarinn. Að vanda er leikið um öll sæti mótsins eins og regla er orðin á heimsmeistaramótum yngri landsliða.
Riðlaskiptingin:
| A-riðill: | B-riðill: | C-riðill: | D-riðill: |
| Portúgal | Ungv.land | Egyptaland | Spánn |
| Króatía | Slóvenía | Ísland | S-Kórea |
| Rúanda | Marokkó | Japan | Brasilía |
| Alsír | N-Sjáland | Tékkland | Barein |
| E-riðill: | F-riðill: | G-riðill: | H-riðill: |
| Danmörk | Noregur | Þýskaland | Svíþjóð |
| Austurríki | Svartfj.land | Argentína | Færeyjar |
| Chile | N-Maked. | S-Arabía | Íran |
| Mexíkó | IHF sigurlið | Bandaríkin | Búrundi |
Þetta verður í fyrsta sinn sem 32 lið taka þátt í HM 19 ára landsliða sem er í samræmi við heimsmeistaramót A-landsliða. Fyrstu 32 liða heimsmeistaramót yngri landsliða fóru fram í kvennaflokki á síðasta sumri í flokkum 18 og 20 ára landsliða.
Leikir í riðli Íslands fara fram í bænum Koprivnica.
Á dögunum völdu Heimir Ríkarðsson og Einar Jónsson hóp pilta til æfinga frá 9. til 12. mars. Hverjir skipa hópinn er að finna í meðfylgjandi frétt.
