Ætlaði sér að verða markahæst í deildinni

„Ég varð næst markahæst í Olísdeildinni í fyrra og setti mér það markmið fyrir þetta tímabil að ná að verða markahæst í Grillinu og það tókst,“ sagði Sylvía Björt Blöndal leikmaður Aftureldingar og markahæsti leikmaður Grill 66-deildar kvenna í handknattleik. Keppni í deildinni lauk á sunnudaginn. Sylvía Björt skoraði 157 mörk, 27 mörkum fleiri en FH-ingurinn Hildur Guðjónsdóttir.

Sylvía Björt skoraði nærri 10 mörk að jafnaði í leik í Grill 66-deildinni.

Elti vinkonu sína úr MR

Sylvía Björt kom til liðs við Aftureldingu fyrir tímabilið 2021/2022 frá FH þar sem hún hafði verið frá því í 4. flokki þegar hún flutti heim frá Danmörku.

„Vinkona mín, Katrín Helga Davíðsdóttir, lék og leikur með Aftureldingu. Við vorum saman í MR. Hún sagði mér að það vantaði fleiri leikmenn í Aftureldingarliðið svo ég sló til. Ég sé ekki eftir því,“ sagði Sylvía Björt þegar handbolti.is tók hana stuttlega tali eftir að Aftureldingarliðið tók við sigurlaunum sínum fyrir sigur í Grill 66-deildinni á heimavelli síðdegis í gær.

„Það er bara geggjað fyrir okkur að vinna deildina og fara strax aftur upp í Olís. Næst á dagskrá hjá okkur verður að halda okkur upp í Olísdeildinni á næsta tímabili. Vonandi náum við því,“ sagði Aftureldingarkonan Sylvía Björt Blöndal, markadrottning Grill 66-deildar kvenna.

Eftirtaldar skoruðu 50 mörk eða fleiri í Grill 66-deild kvenna:

Markahæstar í Grill 66-deild kvenna 2021/2022.

Markahæstar í Grill 66-deild kvenna 2020/2021.