Kórdrengir hafa dregið lið sitt úr keppni í Grill 66-deild karla í handknattleik á næsta keppnistímabili. Flautað verður til leiks í Grill 66-deildinni eftir rúmlega þrjár vikur. Til stóð að Kórdrengir mættu KA U í fyrstu umferð. Handbolti.is hefur fengið staðfest að ungmennalið Fram taki sæti Kórdrengja í Grill 66-deildinni í staðinn.
Voru ekki með en verða með
Fram hefur sent ungmennalið til leiks undanfarin ár sem ýmist hefur átt sæti í Grill 66-deildinni eða í 2. deild. Fram skráði ekki ungmennalið til leiks í vor en til þess að koma í veg fyrir fækkun liða í deildinni tók Fram þá ákvörðun að hlaupa í skarðið fyrir Kórdrengi.
Kórdrengir sendu lið til leiks fyrst í Grill 66-deildina haustið 2021 og náðu ágætum árangri. Þeim gekk hinsvegar mun síður á síðustu leiktíð. Talsverðar breytingar voru á leikmannahópnum. Þeir unnu einn leik en töpuðu 17, gerðu ekkert jafntefli.
Gerðu út frá tveimur stöðum
Ekki gekk klakklaust fyrir Kórdrengi að fá inni til æfinga og keppni í íþróttahúsum á höfuðborgarsvæðinu. Fyrra árið voru þeir með bækistöðvar í Digranesi en á síðustu leiktíð gerðu þeir út frá íþróttahúsi Hauka á Ásvöllum í Hafnarfirði.
Leikjadagskrá Grill 66-deilda.
