- Auglýsing -
Fyrir lokaumferð undankeppni Evrópumóts kvenna í handknattleik á sunnudaginn þarf mikið að ganga á til þess að liðin sem hafna í þriðja sæti í öðrum, þriðja, sjötta og sjöunda riðli (riðill Íslands), fari ekki áfram í lokakeppni EM ásamt tveimur efstu liðum hvers riðls.
Undankepnisriðlarnir eru átta. Tvö efstu lið öðlast keppnisrétt á EM sem fram fer í Austurríki, Ungverjalandi og Sviss 28. nóvember til 15. desember. Fjögur af átta liðum sem verða í þriðja sæti komast einnig áfram í lokakeppnina. Hver þau verða ræðst af innbyrðis úrslitum þriggja efstu liðanna. Árangurinn gegn neðstu liðum verður strikaður út nema í áttunda riðli sem er aðeins skipaður þremur liðum.
Danmörk, Svíþjóð, Frakkland, Svartfjallaland, Holland, Rúmenía, Spánn, Króatía, Norður Makedónía og Þýskaland hafa tryggt sér sæti í lokakeppninni. Einnig Austurríki, Ungverjaland, Sviss sem gestgjafar auk Evrópumeistara Noregs. Tíu farseðlum er óráðstafað að kvöldi miðvikudagsins 4. apríl.
RIÐILL EITT:
- Rúmenía og Króatía hafa tryggt sér sæti í lokakeppni EM.
- Grikkland þarf að vinna Rúmeníu í Rúmeníu til þess að öðlast möguleika á EM-farseðil. Rúmenska liðið vann fyrri viðureignina í Grikklandi, 32:20. Grikkir hafa aldrei unnið Rúmena í handknattleik kvenna.
- Bosnía er úr leik í kapphlaupinu um EM-sæti.
RIÐILL TVÖ: - Þýska landsliðið er öruggt um sæti í lokakeppni EM.
Ísrael er úr leik. - Úkraína er í öðru sæti og heldur því sæti á þrennan hátt: með sigri á Slóvökum í Sala í Slóvakíu á sunnudaginn, með jafntefli, eða með allt að fjögurra marka tapi.
- Slóvakar verða að vinna með a.m.k. sex marka mun. Ef Slóvakar vinna með fimm marka mun verða þeir jafnir Úkraínu og hafna í þriðja sæti vegna lakari samanlagrar stöðu í leikjunum við Þjóðverja.
- Takist Slóvökum að vinna eða ná jafntefli fljóta þeir væntanlega inn á EM sem eitt af fjórum liðum úr þriðja sæti. Hugsanlega munu þeir einnig komast á EM þótt þeir tapi á heimavelli.
RIÐILL ÞRJÚ: - Hollendingar hafa þegar tryggt sér sæti á EM.
- Tékkar standa vel að vígi í öðru sæti. Þeir mæta Portúgölum í Tékklandi. Tékkar unnu fyrri leikinn í Portúgal, 30:26.
- Þótt portúgalska liðið tapi í Tékklandi er sennilegt að það fljóti inn á EM sem eitt af fjórum í þriðja sæti vegna bærilegra úrslita annarra leikja.
- Finnland er úr leik.
RIÐILL FJÖGUR: - Heimsmeistarar Frakklands eru öruggir um farseðil á EM eftir að hafa gjörsigrað alla andstæðinga sína til þessa.
- Slóvenar standa vel að vígi í öðru sæti og eiga heimaleik við Ítalíu. Slóvenar unnu fyrri leikinn á Ítalíu, 31:18.
- Nánast er hægt að útiloka möguleika Ítala á fara áfram sem þriðja sætis lið.
- Lettar eru úr leik.
RIÐILL FIMM:
- Spánverjar og Norður Makedónía hafa tryggt sér sæti í lokakeppni EM.
- Litáen er nánast úr leik. Alltént þarf lið Litáa á kraftaverki að halda í Skopje á sunnudaginn til þess að eiga von um að komast áfram sem þriðja sætis lið.
- Aserbaísjan er úr leik.
RIÐILL SEX: - Svartfellingar hafa fyrri nokkru innsiglað sér keppnisrétt á EM.
- Serbar og Tyrkir kljást um annað sæti í leik sem fram fer í Serbíu.
- Eftir jafntefli í fyrri viðureigninni í Tyrklandi er óhætt að fullyrða að þrjú lið fara áfram úr þessum riðli.
RIÐILL SJÖ: - Svíar hafa þegar tryggt sér sæti í lokakeppni EM.
- Íslenska landsliðið mætir færeyska landsliðinu á Ásvöllum klukkan 16 á sunnudaginn. Aðgangur verður ókeypis.
Eftir fimm marka íslenska sigur í Þórshöfn, 28:23, stendur íslenska liðið vel að vígi og í raun má segja að sigurinn hafi fleytt liðinu a.mk. hálfa leið í lokakeppnina. - Íslenska liðið er alltaf öruggt með annað sætið með sigri eða jafntefli.
- Færeyingar ná öðru sæti með fimm marka sigri vegna þessa að samanlagt töpuðu þeir með minni mun fyrir Svíum en Íslendingar, -22 mörk á móti við -27 hjá íslenska liðinu.
- Lúxemborg er úr leik.
RIÐILL ÁTTA: - Þriggja liða riðill. Danir hafa lokið keppni í riðlinum og hafa tryggt sér sæti í lokakeppni EM.
- Pólverjar eiga annað sætið næsta víst. Þeir eiga heimaleik við Kósovó. Eftir sigur á útivelli má telja afar líklegt að Pólverjar vinni einnig heimaleikinn og þar með sitja Kósovóar eftir.
- Auglýsing -
