Hugsanlegt er talið að króatíska landsliðið, sem Dagur Sigurðsson þjálfar, hafi orðið fyrir þungu höggi í kvöld þegar fyrirliðinn Domagoj Duvnjak meiddist á vinstri fæti í fyrri hálfleik í viðureign Króatíu og Argentínu á HM í handknattleik í Zagreb Arena.
Danskir fjölmiðlar hafa eftir Degi að ekið hafi verið rakleitt með Duvnjak á sjúkrahús eftir að hann fékk aðhlynningu á leikvellinum. Ekki kemur fram hvað nákvæmlega kom fyrir Duvnjak sem er einn dáðasti íþróttamaður Króatíu. Hann tilkynnti fyrir mótið að leikirnir á HM yrði hans síðustu með landsliðinu á 19 ára feril.
Króatíska handknattleikssambandið sagði frá því fyrir stundu að Dagur hafi kallað á Igor Karacic leikmann Kielce í Póllandi inn í hópinn. Karacic kemur til Zagreb snemma á morgun. Hann á að hlaupa í skarðið fyrir Duvnjak ef meiðsli þess síðarnefnda eru alvarleg en óttast er að svo sé.
Króatar unnu Argentínu í kvöld og eru öruggir um sæti í milliriðli. Það mun síðan ráðast af úrslitum viðureignar Króatíu og Egyptalands í lokaumferð F-riðils á sunnudaginn hvort liðanna hreppir efsta sætið og fer með fullt hús stiga áfram í milliriðil.
HM “25: Leikjadagskrá, úrslit, staðan
